| 1 | Idi punganay ti Dios pinarsuana dagiti langlangit ken ti daga. |
| 2 | Ket ti daga adda idi a gosogoso ken awan nagyan; ket dagiti sipnget addada idi iti rabao ti yuyeng: ket ti Espiritu ti Dios nagtignay iti rabao dagiti dandanum. |
| 3 | Ket ti Dios kinunana, Adda coma lawag: ket nagadda ti lawag. |
| 4 | Ket ti Dios nakitana a ti lawag naimbag: ket inlasin ti Dios ti lawag cadagiti sipnget. |
| 5 | Ket ti Dios ninaganna ti lawag aldaw, ket dagiti sipnget ninagananna ti rabii. Ket naadda ti malem ken ti bigat, maysa nga aldaw. |
| 6 | Ket ti Dios kinunana, adda coma maysa a tangatang iti tengnga dagiti dandanum, a pagsisinaan dagiti dandanum cadagiti dandanum. |
| 7 | Ket ti Dios inaramidna ti tangatang, ket insinana dagiti danum nga adda iti baba ti tangatang, cadagiti danum nga adda iti rabaw ti tangatang: ket naaramid a casta. |
| 8 | Ket ti Dios ninaganna, ti tangatang, Langit. Ket naadda ti malem ken ti bigat, aldaw a maicadua. |
| 9 | Ket ti Dios kinunana, mapagtitipon coma dagiti danum nga adda iti baba dagiti langit iti maysa a disso, ket agparang coma ti daga a namaga: ket naaramid a casta. |
| 10 | Ket ti Dios ninagananna ti namaga, Daga ket ti nacatiponan dagiti danum ninagananna Tataaw: ket ti Dios nakitana a nasayaatda, |
| 11 | Ket ti Dios kinunana, Patuboen coma ti daga ti root, mulmula nga adda bukelda ken caycayo nga agbunga nga ti bukelda adda cadacuada cas iti casisigudda, iti rabaw ti daga: ket naaramid a casta. |
| 12 | Ket pinataud ti daga ti root, mulmula nga addaan bukel a mayannatup iti casisigudda, ken caycayo nga agbunga a ti bukel adda cadacuada cas ti casisigudda: ket ti Dios nakitana a nasayaatda. |
| 13 | Ket naadda ti malem ken ti bigat, aldaw a maicatlo. |
| 14 | Ket ti Dios kinunana, Adda coma dagiti silsilaw iti tangatang dagiti langit tapno aglasin ti aldaw ken ti rabii: ket maipaayda coma a cas pagilaslasinan, ken panpanawen, al-aldaw, ken tawtawen: |
| 15 | Ket maipaayda coma a silsilaw iti tangatang dagiti langit a manglawag iti daga: ket naaramid a casta. |
| 16 | Ket ti Dios inaramidna dagiti dua a silsilaw a dadackel: ti silaw a dacdackel tapno aggundaway iti aldaw, ket ti silaw a basbassit tapno aggundaway iti rabii: inaramidna met dagiti bitbitwen. |
| 17 | Ket ti Dios insaadna ida iti tangatang dagiti langit, tapno lawaganda ti rabaw ti daga, |
| 18 | Ken tapno aggundaway iti aldaw ken iti rabii, ken tapno aglasin ti lawag ken sipnget: ket ti Dios nakitana a nasayaatda. |
| 19 | Ket naadda ti malem ken ti bigat, aldaw a maicapat. |
| 20 | Ket ti Dios kinunana agpangen coma cadagiti dandanum dagiti parsua a nabiag ken agtayab dagiti tumatayab iti ngato ti daga iti tangatang dagiti langit. |
| 21 | Ket ti Dios pinarsuana dagiti dadackel nga animal ti taaw ken isu-amin a kita a nabiag nga aggaraw a nagpangenda cas ti casisigudda cadagiti danum, ken amin a tumatayab a nagpayac cas iti casisigudda; ket ti Dios nakitana a nasayaatda. |
| 22 | Ket ti Dios binendicionanna ida a cunana, Agbungacayo coma ket agaducayo, ket punnoenyo dagiti danum dagiti taaw, ket dagiti tumatayab agaduda coma iti daga. |
| 23 | Ket naadda ti malem ken ti bigat, aldaw a maicalima. |
| 24 | Ket ti Dios kinunana, Patauden coma ti daga dagiti parsua a nabiag cas iti cakikitada, an-animal, ken agcarcarayam ken agcacarungsot iti daga cas iti cakikitada: ket naaramid a casta. |
| 25 | Ket ti Dios inaramidna dagiti agcacarungsot iti daga cas iti casisigudda, ken an-animal, cas iti cakikitada, ken isu-amin nga aguy-uyas iti daga cas iti casisigudda: ket ti Dios nakitana a nasayaatda. |
| 26 | Ket ti Dios kinunana, Aramidentayo coma ti tao iti ladawantayo, cas caaspingtayo: ket iturayanda coma dagiti ic-ican ti taaw, ken dagiti tumatayab cadagiti langit ken dagiti an-animal, ken ti amin a daga, ken dagiti amin nga agcarcarayam nga aguy-uyas iti rabaw ti daga. |
| 27 | Ket ti Dios pinarsuana ti tao a caladawanna met laeng, iti ladawan ti Dios pinarsuana; pinarsuana ida a lalaki ken babai. |
| 28 | Ket ti Dios binendicionanna ida, ket ti Dios kinunana cadacuada, Agbungacayo, ket agaducayo, ket punnoenyo ti daga, agbalincayo nga Appo kencuana; ket iturayanyo dagiti ican ti taaw, ken dagiti tumatayab cadagiti langit, ken amin nga parsua a sibibiag nga aggaraw iti rabaw ti daga. |
| 29 | Ket ti Dios kinunana, Adtoy, iniccancayo iti isu-amin a roroot nga addan bukel, nga adda iti rabaw ti amin a daga: ken isu-amin a cayo nga addaan bunga nga agpataud ti bin-i; maipaaydanto a canenyo. |
| 30 | Ken cadagiti isu-amin nga an-animal iti daga, ken amin a tumatayab iti langit, ken amin nga aggaraw iti rabaw ti daga nga addaan biag, maipaay coma cadacuada a canenda ti amin a nalasbang a root: ket naaramid a casta. |
| 31 | Ket ti Dios nakitana amin nga inaramidna, ket, adtoy, nasayaatda unay. Ket naadda ti malem ken ti bigat, aldaw a maicanem. |